A Consellería de Promoción do Emprego e Igualdade celebra o vindeiro 1 de xullo o Día Internacional do Cooperativismo en Narón (A Coruña), onde se entregarán a partir das 12:00 horas do mediodía os Premios ao Cooperativismo 2023. A celebración deste ano leva por lema “Cooperativas polo desenvolvemento sostible”.

O acto terá lugar nas instalacións da cooperativa Agroflor e serán recoñecidas as cooperativas Alén (A Coruña), galardoada co premio aos valores cooperativos; Enraizando (Ribeira), que recibirá o premio ao mellor proxecto cooperativo novo, e Ferrolana de Profesores de Autoescuela (Ferrol), que obtén o premio á traxectoria cooperativa.

A Xunta tamén fará a entrega de premios a Proxectos Empresariais Cooperativos do Certame Cooperativismo no Ensino 2023 na modalidade de centros de Formación Profesional e ensinanzas de réxime especial, cuxo gañador é o proxecto Holística, Sociedade Cooperativa Galega presentado polo alumnado do IES A Guía. O accésit nesta mesma categoría recíbeo o proxecto Sail2Day, presentado polo alumnado da Sociedade Cooperativa Galega Mendiño.

Con iniciativas como estas, a Xunta de Galicia procura promover e destacar os principios da fórmula cooperativa entre a sociedade e recoñece publicamente o traballo realizado polas cooperativas no seu compromiso coa a igualdade, a proximidade e a xeración de emprego.

Se queres asistir ao acto, deberás confirmar a túa asistencia mediante este formulario.

Consulta o programa e máis información a través desta ligazón.