Terra de Trasancos acolle un obradoiro para estudantes sobre saídas profesionais no rural

Estudantes do IES da Terra Cha, José Trapero Pardo (Castro de Ribeiras de Lea) participaron esta mañá nunha actividade sobre crecemento laboral no medio rural impartida por AGACA no marco da Rede Eusumo, na Fundación Terra de Trasancos (Narón).

Unha trintena de estudantes de Formación Profesional do IES da Terra Cha, José Trapero Pardo (Castro de Ribeiras de Lea, Lugo) asistiron na mañá do 27 de Marzo de 2017 a unha charla sobre opcións de desenvolvemento laboral no medio rural que tivo lugar na Fundación Terra de Trasancos (Narón).

Os estudantes recibiron información sobre os valores e principios nos que se basea o cooperativismo, así como algunhas das axudas e apoios públicos que existen para as persoas mozas que decidan emprender ou incorporarse a actividades no medio rural dentro da economía social.

Visitaron diferentes iniciativas de carácter socio-económico que desenvolve Terra de Trasancos, entre elas perruquería, ximnasio, cafetería, supermercado e horta, para coñecer de primeira man o funcionamento dunha entidade destas características.

A actividade, enmarcada nun obradoiro “Emprendemento e cooperativas. Modelo de éxito”, é darlles a coñecer este modelo de negocio a mozos e mozas, para que o teñan en consideración ao finalizar os seus estudos.

Fundación Terra de Trasancos é un dos seis Centros de atención permanente da Rede Eusumo que actúa como punto de información e asesoramento presencial sobre cooperativismo para calquera que estea interesado en iniciar ou continuar desenvolvendo a súa actividade profesional baixo ese modelo de negocio.

 

Rede Eusumo

Asesoramento, orientación, formación, acompañamento nas iniciativas empresariais, apoio á internacionalización, celebración de encontros internacionais e transfronteirizos, intercambio comercial e cooperación transversal definen a rede transversal de colaboración Eusumo, nacida en 2011.

Mércores, 29 March, 2017 - 13:00

Compartir