A directora xeral de Traballo Autónomo e Economía Social, Marta Mariño, acompañada polo delegado territorial da Xunta en Pontevedra, Agustín Reguera, participou hoxe na xornada de presentación da Academia Factoría da Economía Social, organizada pola Unión de Cooperativas EspazoCoop nas instalacións do Polo de Emprendemento de Vilanova de Arousa. O obxectivo desta nova iniciativa, encadrada no marco das actividades da Rede Eusumo, é fortalecer as habilidades das persoas emprendedoras no ámbito do cooperativismo e da economía social en Galicia, achegando os recursos e medidas de apoio necesarios para desenvolver e xestionar os seus proxectos.

Durante o acto —no que tamén estivo presente o alcalde de Vilanova de Arousa, Gonzalo Durán—, Marta Mariño destacou a importancia deste tipo de accións para continuar divulgando a economía social e fomentando o impulso de modelos empresariais sostibles e con impacto. Ademais resaltou que 2025 é o Ano Internacional das Cooperativas, para o que se conta cun calendario de actividades destacado para dar maior visibilidade a estas entidades. Tamén lembrou que o Goberno autonómico pon a disposición de todo o tecido emprendedor as 15 oficinas activas por toda Galicia da Rede de polos, nas que se ofrece asesoría e acompañamento gratuíto na posta en marcha ou consolidación de calquera fórmula de negocio. Concretamente, o Polo de Vilanova, aberto en novembro do pasado ano, xa atendeu ata o de agora arredor de 90 proxectos e realizou máis de 150 titorías.

Fonte: Xunta de Galicia