A directora xeral de Traballo Autónomo e Economía Social, Marta Mariño, visitou hoxe o Polo de emprendemento e apoio ao emprego de Vilanova de Arousa, onde participou no Demoday da aceleradora de economía social Xunta Impulsa, que acolleu precisamente o Polo arousán. Trátase dunha iniciativa de formación e asesoramento que se completou con sesións de mentoría especializada dentro do proxecto transfronteirizo ES-Factory, de cooperación Galicia–Norte de Portugal e cofinanciado polo Fondo Europeo de Desenvolvemento Rexional (FEDER) no marco do programa Interreg VI A España – Portugal (POCTEP) 2021-2027.

Destacando a variedade das iniciativas participantes que hoxe presentan os seus proxectos ante un xurado, Mariño sinalou que proceden de toda Galicia e que predominan as do ámbito educativo ou cultural, así como as que dan protagonismo ao rural e á natureza no campo da produción agroalimentaria, da gastronomía, do ocio ou da cosmética. Tamén está representado o eido do deporte, o do benestar ou o sector TIC.  

Segundo a directora xeral, a aceleradora de economía social desenvolveuse tanto con sesións presenciais no Polo de emprendemento de Vilanova de Arousa como con outras telemáticas, para culminar hoxe neste acto final de posta en valor das iniciativas e dos avances acadados grazas ás sinerxías xeradas entre as distintas persoas participantes, co fin de consolidar a fórmula da economía social como xeradora de emprego e actividade económica pegados ao territorio.

Balance do Polo de Vilanova

A representante autonómica aproveitou a visita para poñer de relevo o labor do Polo vilanovés, salientando que, desde a súa posta en marcha en novembro de 2024, ten atendido uns 340 proxectos e promovido a creación de preto dunha trintena de empresas.

Así, o equipo técnico do centro vilanovés realizou máis de 870 sesións de titoría gratuítas e individualizadas co gallo de dar resposta ás persoas emprendedoras que acudiron ás instalacións (un 56 % delas, mulleres), adaptándose ás fases concretas dos seus proxectos.  

Por sectores, destacan as actividades administrativas e servizos auxiliares (18 %), seguidas dos servizos (14 %) e das actividades artísticas e de entretenemento (14 %). Canto ás actividades, o Polo de Vilanova ten organizado máis de 70, entre reunións con entidades do territorio, accións de formación e eventos.

Fonte: C. de Emprego, Comercio e Igualdade