O conselleiro de Emprego, Comercio e Emigración, José González, reafirmou hoxe en Vilanova de Arousa a importancia da colaboración institucional e do aproveitamento de sinerxías para fortalecer o ecosistema emprendedor galego. Fíxoo no marco do décimo aniversario do evento "10 anos creando emprego, formación e emprendemento", organizado polo Centro de Desenvolvemento Local (CDL) de Vilanova de Arousa, coa presenza do alcalde Gonzalo Durán.

O acto serviu para anunciar unha iniciativa crave no impulso da economía social: a aceleradora Xunta Impulsa, enmarcada no proxecto transfronteirizo ES-Factory. Este proxecto, froito da cooperación entre Galicia e o Norte de Portugal e financiado polo programa POCTEP, reforza o compromiso co desenvolvemento de modelos empresariais sostibles e socialmente responsables no territorio.

ES-Factory consolídase así como un motor estratéxico para a economía social galega, proporcionando formación especializada e asesoramento a dez proxectos seleccionados que participarán nun programa formativo e sesións de mentoría. As persoas e entidades interesadas poderán presentar a súa candidatura ata o 3 de decembro, co obxectivo de impulsar iniciativas que xeren impacto social e económico na rexión.

A aceleradora terá a súa sede no Pazo Vista Real de Vilanova, espazo que alberga tanto o CDL como o Polo de emprendemento de Vilanova, unha das 15 oficinas despregadas pola Xunta en Galicia. Durante o seu primeiro ano de funcionamento, este Polo atendeu xa a 250 proxectos, no marco dos máis de 5.100 asesorados en toda a comunidade autónoma.

González destacou que a coexistencia do CDL, o Polo e agora a aceleradora Xunta Impulsa-ES-Factory exemplifica a necesaria cooperación entre administracións e o valor das sinerxías entre emprego, autoemprego e economía social. O CDL, ademais, é centro homologado pola Xunta para impartir certificacións profesionais, actuando como motor de novas oportunidades en liña coas necesidades da contorna.

Con ES-Factory, Galicia dá un paso máis na súa aposta por consolidarse como referente en economía social e emprendemento transfronteirizo.

Fonte: C. de Emprego, Comercio e Emigración