HUB Olympe Emprende abre en Galicia unha nova convocatoria para incorporar proxectos liderados por mulleres á súa aceleradora de economía social. A participación é completamente gratuíta e as inscricións permanecerán abertas ata o 31 de decembro de 2026. As participantes seleccionadas comezarán en xaneiro de 2027 un programa de cinco meses para desenvolver e consolidar as súas iniciativas.

A nova convocatoria dá continuidade ao traballo desenvolvido por HUB Olympe Emprende en Galicia, onde 32 mulleres participaron xa nos diferentes procesos impulsados polo programa. Agora ábrese unha nova oportunidade para incorporar mulleres e equipos que estean dando forma a unha idea de emprendemento colectivo ou queiran avanzar na posta en marcha dunha iniciativa de economía social.

Quen pode participar?

A convocatoria está dirixida a mulleres ou equipos coliderados por mulleres que teñan unha idea de emprendemento colectivo ou queiran transformar un proxecto existente nunha iniciativa de economía social. Tamén está aberta a empresas de economía social lideradas por mulleres que se atopen en proceso de constitución ou que fosen creadas recentemente.

Non é necesario contar cunha empresa xa constituída nin ter o proxecto completamente definido. A aceleradora está deseñada precisamente para acompañar as participantes desde as primeiras fases, axudándoas a analizar a súa proposta, traballar na súa viabilidade e avanzar na definición do seu modelo de negocio.

Cinco meses de acompañamento gratuíto

A nova edición comezará en xaneiro de 2027 e terá unha duración de cinco meses. Durante este período, as participantes terán acceso, sen custo, a formación, asesoramento personalizado, coaching, encontros e unha comunidade de emprendedoras.

O itinerario permitirá traballar directamente sobre as necesidades de cada iniciativa e contar con acompañamento especializado para avanzar na súa posta en marcha ou consolidación.

Ademais do traballo desenvolvido especificamente en Galicia, as participantes formarán parte da comunidade interterritorial de HUB Olympe Emprende, que conecta proxectos e emprendedoras de Galicia, Andalucía e Cataluña.

Ata o momento, 162 mulleres participaron nos diferentes procesos de HUB Olympe Emprende: 32 en Galicia, 54 en Andalucía e 76 en Cataluña. Esta estrutura permite intercambiar metodoloxías, identificar necesidades comúns e poñer en contacto proxectos xurdidos en territorios con diferentes realidades socioeconómicas.

Inscricións abertas ata o 31 de decembro

As mulleres e equipos interesados en participar na próxima edición poden presentar a súa candidatura ata o 31 de decembro de 2026. Tras o proceso de selección, a aceleradora comezará en xaneiro de 2027 e desenvolverase durante cinco meses.

O Fondo Social Europeo Plus, a través da Confederación Empresarial Española da Economía Social (CEPES), na súa calidade de organismo intermedio do programa EFESO, cofinanciou este proxecto.